Las Cañas Vianako lurretan dago: Nafarroako herri hori Arabatik gertu dago, eta Errioxarekiko muga naturala Ebro ibaia da. Eremua Estellerriko Erriberan dago, eta bertako klimaren ezaugarriak dira negu hotzak eta uda lehor eta beroak. Paisaiaren ezaugarri nagusiak dira labore soroak, azalera handiak hartzen baitituzte, baita mahasti, olibadi eta beste labore mediterraneo batzuk ere.  

Longar hipogeoa Vianako hilobi megalitiko bat da, eta frogatzen du Neolitiko-Kalkolitoan gizakiak bizi izan zirela paraje horietan. Erromatarrak ere finkatu ziren ingurune horretan, eta zenbait altxor utzi zituzten, adibidez Musen mosaikoa, Arellanon. Mende batzuk geroago, Vianak eta inguruko beste herri batzuek Europako ibilbide kultural, erlijioso eta ekonomiko handienetako bat osatu zuten: Donejakue Bidea.